ಚಿತ್ರದುರ್ಗ : ಸಚಿವ ಸ್ಥಾನ ಕೊಡಲಿಲ್ಲ ಎಂದು ಶಾಸಕರು ಅತೃಪ್ತರಾಗಿ, ಸಮಾರಂಭಗಳಿಗೆ ಗೈರಾಗುವುದು ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ಸರಿಯಲ್ಲ. ನಿಮ್ಮ ಕ್ಷೇತ್ರಕ್ಕೆ ಏನಾಗಬೇಕು, ಜನರಿಗೆ ಏನಾಗಬೇಕೆಂದು ಕೇಳಿ ಕೆಲಸ ಮಾಡಿಸಿ. ಕ್ಷೇತ್ರದ ಅಭಿವೃದ್ಧಿಗೆ ಮೊದಲ ಆದ್ಯತೆ ನೀಡಿ. ಮಂತ್ರಿ ಕೊಡುವುದು, ಬಿಡುವುದು ನಿಮಗೆ ಬಿಟ್ಟ ವಿಚಾರ ಅಂತ ಸಿಎಂ ಯಡಿಯೂರಪ್ಪಗೆ ಹೇಳಿ ಎಂದು ಹೊಳಲ್ಕೆರೆಯ ಬಿಜೆಪಿ ಶಾಸಕ ಎಂ.ಚಂದ್ರಪ್ಪ, ಚನ್ನಗಿರಿಯ ಬಿಜೆಪಿ ಶಾಸಕ ಮಾಡಾಳ್ ವಿರುಪಾಕ್ಷಪ್ಪಗೆ ಸಿರಿಗೆರೆಯ ತರಳಬಾಳು ಮಠದ ಡಾ.ಶಿವಮೂರ್ತಿ ಶಿವಾಚಾರ್ಯ ಸ್ವಾಮೀಜಿ ಕಿವಿಮಾತು ಹೇಳಿದ್ದಾರೆ.
ಸಿರಿಗೆರೆಯಲ್ಲಿ ಆಯೋಜಿಸಲಾಗಿದ್ದ ಸಾಸ್ವೆಹಳ್ಳಿ ಏತನೀರಾವರಿ ವಿಚಾರದ ಸಭೆಯಲ್ಲಿ ಭಾಗವಹಿಸಿದ ಬಳಿಕ ತರಳಬಾಳು ಮಠದ ಶಾಂತಿವನದಲ್ಲಿ ಶಾಸಕರು ತರಳಬಾಳು ಶ್ರೀಗಳನ್ನು ಭೇಟಿ ಮಾಡಿದರು. ಈ ಸಂದರ್ಭದಲ್ಲಿ ನಿಮ್ಮ ಕ್ಷೇತ್ರಗಳಿಗೆ ನೀರಾವರಿ ಯೋಜನೆಗಳನ್ನು ತಂದರೆ ನೀವು ಮಂತ್ರಿಗಿರಿಗಿಂತ ಹೆಚ್ಚು ಸಾಧಿಸಿದಂತೆ ಅಲ್ಲವೇ. ಕಾಂಗ್ರೆಸ್ , ಬಿಜೆಪಿ ಮತ್ತು ದಳ ಎಲ್ಲರಿಗೂ ನಾನು ಗುರುವಾಗಿ ಹೇಳುವುದಿಷ್ಟೇ ಎಂದು ಶಾಸಕರಿಗೆ ಕಿವಿಮಾತು ಹೇಳಿದರು. ಶ್ರೀಗಳ ಮಾತಿಗೆ ಶಾಸಕರು ಸರಿ ಬುದ್ಧಿ ಎಂದರು ಎಂದು ತಿಳಿದು ಬಂದಿದೆ.
