ಸುಮಾರು ಆರು ವರ್ಷದ ಹೆಣ್ಣು ಹುಲಿಯೊಂದನ್ನ ಜನ ಕೋಲಿನಿಂದ ಹೊಡೆದು ಹತ್ಯೆ ಮಾಡಿದ ಘಟನೆ ಉತ್ತರ ಪ್ರದೇಶದ ಪಿಲಿಬಿಟ್ ಜಿಲ್ಲೆಯಲ್ಲಿ ನಡೆದಿದೆ. ಲಖನೌ ನಗರದಿಂದ ಸುಮಾರು 240 ಕಿ.ಮೀ ದೂರದ ಪಿಲಿಬಿಟ್ ಬಳಿ ಟೈಗರ್ ರಿಸರ್ವ್‌ ಇದ್ದು ಹೆಚ್ಚು ಹುಲಿಗಳಿವೆ. ಸಾವನ್ನಪ್ಪಿದ ಹುಲಿ ಗ್ರಾಮಸ್ಥರೊಬ್ಬರ ಮೇಲೆ ದಾಳಿ ನಡೆಸಿತ್ತು. ಅರಣ್ಯಾಧಿಕಾರಿಗಳು ಗ್ರಾಮಸ್ಥರು ಮಾಹಿತಿ ನೀಡಿದರೂ ಸರಿಯಾಗಿ ಸ್ಪಂದಿಸಿರಲಿಲ್ಲ ಎನ್ನಲಾಗಿದೆ. ಪರಿಣಾಮ ಗ್ರಾಮಸ್ಥರು ಹುಲಿ ಯಾವಾಗ ಗ್ರಾಮಕ್ಕೆ ನುಗ್ಗುತ್ತದೋ ಎಂಬ ಭೀತಿಯಲ್ಲಿದ್ದರು. ಗ್ರಾಮದ ಜನರೆಲ್ಲಾ ಸೇರಿ ಕೋಲಿನಿಂದ ಹೊಡೆದು ಹುಲಿಯನ್ನು ಹತ್ಯೆ ಮಾಡಿದ್ದಾರೆ ಎಂದು ತಿಳಿದು ಬಂದಿದೆ. ಈ ಬಗ್ಗೆ ಪೊಲೀಸರು ಗ್ರಾಮದ ಅನೇಕರ ವಿರುದ್ಧ ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ.
