ಮಧ್ಯಪಾನ ಆರೋಗ್ಯಕ್ಕೆ ಹಾನಿಕಾರಕ ಎಂಬುದು ನೆನಪಿರಲಿ
ರಾಜಸ್ಥಾನದ ಮರಳುಗಾಡಿನಲ್ಲಿ ಬೆಳೆದ ಆಲಿವ್ ಎಂಬ ಗಿಡದ ಎಲೆಗಳಿಂದ ತಯಾರಿಸಿದ ವೈನ್ ಒಂದು ಸಕ್ಕರೆ ಖಾಯಿಲೆ ಹಾಗೂ ಮಾರಣಾಂತಿಕ ಕ್ಯಾನ್ಸರ್ ಖಾಯಿಲೆಗೆ ರಾಮಬಾಣವಾಗಿದೆ ಎನ್ನಲಾಗುತ್ತಿದೆ. ಸದ್ಯ ರಾಜಸ್ಥಾನಿ ವೈನ್ ಮಾರುಕಟ್ಟೆಗೆ ಪರಿಚಯವಾಗುವ ಕಾಲ ಸನ್ನಿಹಿತವಾಗಿದೆ ಎಂದು ತಿಳಿದು ಬಂದಿದೆ.
ಭಾರತದ ರಾಜಸ್ಥಾನ ರಾಜ್ಯ ಹೊರತು ಪಡಿಸಿದರೆ ಇಸ್ರೇಲ್, ಇಟಲಿ ಮತ್ತು ಅರ್ಜೆಂಟೈನಾ ದೇಶಗಳಲ್ಲಿ ಆಲಿವ್ ಗಿಡ ಬೆಳೆಯುತ್ತದೆ. ಆದರೆ, ಈವರೆಗೆ ಬೇರೆ ದೇಶಗಳಲ್ಲಿ ಆಲಿವ್ ಗಿಡದ ಎಲೆಗಳನ್ನು ಬಳಸಿ ವೈನ್ ತಯಾರಿಸುವ ಚಿಂತನೆ ನಡೆದಿಲ್ಲ ಎಂದು ರಾಜಸ್ಥಾನ ಆಲಿವ್ ಕಲ್ಟಿವೇಷನ್ ಲಿ. ಮುಖ್ಯಸ್ಥ ಯೋಗೇಶ್ ಕುಮಾರ್ ವರ್ಮಾ ಮಾಧ್ಯಮಗಳಿಗೆ ತಿಳಿಸಿದ್ದಾರೆ.
ರಾಜಸ್ಥಾನ ಆಲಿವ್ ಕಲ್ಟಿವೇಷನ್ ಲಿಮಿಟೆಡ್ ಈಗಾಗಲೇ ಪೇಟೆಂಟ್ ಗಾಗಿ ಕೇಂದ್ರ ಸರ್ಕಾರದ ಮೊರೆ ಹೋಗಿದೆ. ಫಿನೋಲೆಕ್ಸ್ ಪಾಲ್ಸನ್ ಇಂಡಸ್ಟ್ರೀಸ್ ಸಹಯೋಗದೊಂದಿಗೆ ಆಲಿವ್ ವೈನ್ ಇಷ್ಟರಲ್ಲೇ ಮಾರುಕಟ್ಟೆಗೆ ಲಗ್ಗೆಯಿಡಲಿದೆ ಎಂದು ತಿಳಿದು ಬಂದಿದೆ. ಆದರೆ, ಆಲಿವ್ ವೈನ್ ಎಷ್ಟರ ಮಟ್ಟಿಗೆ ಚಿಕಿತ್ಸಕ ಶಕ್ತಿ ಹೊಂದಿದೆ ಅಥವಾ ಇದೊಂದು ಬ್ರ್ಯಾಂಡ್ ಪ್ರಚಾರ ತಂತ್ರವೇ ಎಂಬುದು ಮಾತ್ರ ಆಲಿವ್ ವೈನ್ ಮಾರುಕಟ್ಟೆಗೆ ಬಂದ ಬಳಿಕವಷ್ಟೇ ಖಾತ್ರಿ ಆಗಲಿದೆ.
