ಬಾಲ್ಯದಿ ರಂಜಿಸಿದ ಆ ಗಂಧರ್ವರು ಈಗೆಲ್ಲಿಹರು – DN ಅಕ್ಕಿ ಬರೆದ ಸಾಂಸ್ಕೃತಿಕ ಕಾವ್ಯ

ಮತ್ತೆ ಬಂದಾರೆ…ಆ ಗಂಧರ್ವರು

ಹೋದಿರೆತ್ತ ನನ ಬಾಲ್ಯ ರಂಜಿಸಿ
ಮತ್ತೆ ಬರದೆ ನೀವು |
ಚಿತ್ತ ಕಲಕಿದೆ ನಿಮ್ಮ ನೋಡಲು
ಬರುವ ಮುನ್ನ ಸಾವು || 1 ||

ಪುಂಗಿಯೂದಿ ಹೆಡೆನಾಗರಾಡಿಸುವ
ಗಾರುಡುಗನೇ?ಹಾವಾಡಿಗ |
ಲಾಗಹಾಕಿಸಿ ಸಲಾಮು ಹೊಡೆಸಿ
ಕೋತಿಕುಣಿಸುವವ ಕಿಲಾಡಿಗ || 2 ||

ವೇಷಗಾರರು ಬಂದರೆಂದರೆ
ನಮಗೆಲ್ಲ ಹಿಗ್ಗಿನೂಟ |
ಗರ್ದ್ದಿಗಮ್ಮತ್ತಿನ ಗಾಜುಕಿಂಡಿಯಲಿ
ತೆರೆದಿಟ್ಟ ಯಕ್ಷಲೋಕ || 3 ||

ಸುಡಗಾಡಸಿಧ್ಧರು ಬಾಳಸಂತರು
ಕರಡಿಯಾಟದ ಬೆರಗು |
ಗಂಗೆತ್ತಿನವರು ಬುಡಬುಡಕಿಯವರು
ಹಾಡಿನಿಂಪಿನ ದಾಸರು || 4 ||

ಶ್ರಾವಣದ ತಿಂಗಳ ನಸುಕಿನಲ್ಲಿ
ಚಳ್ಳಮ್ಮ ದಮಡಿಯ ಭಜನೆಯು |
ಗಾಢ ನಿದ್ದೆಯ ಸರಿಸಿ ಊರಿಗೆ
ದೇವಗಾನದ ಲಹರಿಯು || 5 ||

ಗೀಗೀಮೇಳ ಅಲಾಯಿಹಾಡು
ಗೊಂದಲಿಗರ ಕಥನಕಾವ್ಯ |
ಕಂದೀಲಬೆಳಕಲಿ ಛತ್ತರಿಯ ಹಿಡಿದು
ಬರವುದನರುಹುವ ಸಾರುವಯ್ಯ || 6 ||

ಎಳೆತನದ ಆಟ ಗೆಳೆತನದ ಕೂಟ
ನೆನಪೊಂದು ಮಧುರ ಕಬ್ಬ |
ಮತ್ತೆ ಬಂದರೆ ಆ ಗಂದರ್ವರೆಲ್ಲ
ಮುಪ್ಪಿಗೊಂದು ಹಬ್ಬ || 7 ||

-ಡಿ.ಎನ್.ಅಕ್ಕಿ.ಗೋಗಿ