ಗೌರವದ ನಮನ
ಈಮಣ್ಣ ಕಣಕಣವು
ಕರೆಯುತ್ತಿದೆ ನಿಮ್ಮನು |
ಕೃಷ್ಣೆಭೀಮೆಯರ ಕಲ
ಕಲದಲೂ ನಿಮ್ಮ ನೆನಪು || ೧ ||
ಮಾರ್ದನಿಸಿವೆ ಬೆಟ್ಟಕಣಿವೆ
ನಿಮ್ಮ ಅಚ್ಚಳಿಯದ ಸೇವೆಯ
ಅನುರಣಿಸುತ್ತಿದೆ ಗಗನ
ನಿಮ್ಮ ಸಮರ್ಪಣೆಯ || ೨ ||
ಬಣ್ಣ ನೋಡಲಿಲ್ಲ. ಬಡವ
ಬಲ್ಲಿದ ಭೇದವೆಣಿಸಲಿಲ್ಲ |
ನೊಂದವರನು ಮೇಲೆತ್ತಿ
ಬದುಕಿತ್ತ ಧೀಮಂತ || ೩ ||
ಸಚಿವರಾಗಿದ್ದರೂ ಅಹಂ
ಇಲ್ಲದ ವಿನಯವಂತ |
ಮನಮುಟ್ಟಿ ಜನತೆಗೆ
ಒಳಿತು ಮಾಡಿದಾತ || ೪ ||
ಭಗೀರಥನಂತೆ ಕೃಷ್ಣೆಯನು ಹರಿಸಿ
ಹೊಲಗದ್ದೆಗೆ ಜೀವ ತಂದಾತ |
ನಿಟ್ಟುಸಿರ ನೀಗಿದ ನೆಮ್ಮದಿಯ ದಾತ
ದೂರದೃಷ್ಟಿಯ ಜನನಾಯಕ || ೫ ||
ನಿಮ್ಮ ಸಾಧನೆಗೆ ಭಪ್ಪರೆ
ಎನುತಿದೆ ಕಾಲ |
ದರ್ಶನಾಪುರದ ಕೊಡುಗೆಗೆ
ಧನ್ಯತೆಯಲಿ ನಮಿಸುತ್ತಿದೆ ನಾಡು || ೬ ||
ನಿಮ್ಮ ಸಂತತಿಯು ಹೊತ್ತಿದೆ
ನಿಮ್ಮ ಕನಸ ಪಲ್ಲಕ್ಕಿಯ |
ಶುಭದಿ ಕಾಯತ್ತಿದೆ ಶರಣ
ಮಹಂತರ ಕೃಪೆಯು || ೭ ||
ನಿಮ್ಮ ದಿವ್ಯಾತ್ಮಕ್ಕೆ ಭಕ್ತಿ
ಗೌರವದ ನಮನ |
ನಿಮ್ಮ ಪದತಲಕಿದೋ
ನನ್ನ ಶೃದ್ಧೆಯ ಕವನ || ೮ ||
••••••
ಇಂಡಿ. — ಡಿ.ಎನ್.ಅಕ್ಕಿ.
೧೪.೧೧.೨೦೨೬.
