ವಿಶ್ವಖ್ಯಾತಿ ದಸರಾ ಉತ್ಸವ ಉದ್ಘಾಟನೆಗೆ ಗವಿಶ್ರಿ ಆಯ್ಕೆ: ವೀರಶೈವ ಸಮಾಜ ಹರ್ಷ
ವಿನಯವಾಣಿ ವಾರ್ತೆ
ಶಹಾಪುರ: ವಿಶ್ವಪ್ರಸಿದ್ಧ ಮೈಸೂರು ದಸರಾ ಮಹೋತ್ಸವ-2026 ರ ಉದ್ಘಾಟನೆಗೆ ಕೊಪ್ಪಳದ ಪ್ರಸಿದ್ಧ ಗವಿಮಠದ ಪೀಠಾಧಿಪತಿಗಳಾದ ಅಭಿನವ ಗವಿಸಿದ್ಧೇಶ್ವರ ಮಹಾಸ್ವಾಮಿಗಳನ್ನು ಆಯ್ಕೆ ಮಾಡಿರುವದು ಇಲ್ಲಿನ ಅಖಿಲ ಭಾರತ ವೀರಶೈವ ಮಹಾ ಸಭಾ ಘಟಕ ಹರ್ಷ ವ್ಯಕ್ತಪಡಿಸಿದೆ.
ಈ ಕುರಿತು ಪ್ರಕಟಣೆಯಲ್ಲಿ ಅಭಿಪ್ರಾಯ ವ್ಯಕ್ತಪಡಿಸಿದ ತಾಲ್ಲೂಕು ಅಭಾವಿ ಮಹಾಸಭಾ ಅಧ್ಯಕ್ಷ ಸಿದ್ದಣ್ಣ ಆರಬೋಳ, ದಸರಾ ಉದ್ಘಾಟನೆಗೆ ಸಿಎಂ ಡಿ.ಕೆ. ಶಿವಕುಮಾರ ಗವಿಶ್ರೀ ಹೆಸರು ಹೇಳುತ್ತಿದ್ದಂತೆ ಸಮಾಜಬಾಂಧವರಲ್ಲಿ ಸಂತಸ ಹಿಮ್ಮಡಿಗೊಂಡಿದ್ದು, ತಮ್ಮ ಪ್ರವಚನ ಮೂಲಕ ಸಮಾಜ ತಿದ್ದುತ್ತಿರುವ ಅಲ್ಲದೆ ಶೈಕ್ಷಣಿಕವಾಗಿ ಅಗಾಧ ಸೇವೆ ಸಲ್ಲಿಸುತ್ತಿರುವ ಮಹಾನ್ ಸಂತ ಗವಿಶ್ರೀ ಅವರ ಅಮೃತ ಹಸ್ತದಿಂದ ದಸರಾ ಉದ್ಘಾಟನೆ ಕಣ್ತುಂಬಿಸಿಕೊಳ್ಳಲು ನಾಡಿನ ಜನ ಕಾತರರಾಗಿದ್ದಾರೆ.
ಸಹಸ್ರಾರು ಭಕ್ತರು ಶ್ರೀಗಳ ದಸರಾ ಉದ್ಘಾಟನೆ ನಂತರ ಅವರ ಅಮೃತವಾಣಿ ಕೇಳುವ ತವಕದಲ್ಲಿದ್ದು, ಈ ಬಾರಿ ದಸರಾ ಹಬ್ಬ ಗವಿಶ್ರೀಗಳ ಆಶೀರ್ವಾದದೊಂದಿಗೆ ಸಂಭ್ರಮ ಹೆಚ್ಚಿಸಿದೆ ಎಂದು ತಿಳಿಸಿದ್ದಾರೆ.
