ಪ್ರತಿ ಕೆಲಸ ಕಾರ್ಯ ಸಂಸ್ಕಾರಯುತವಾಗಿರಲಿ – ಸಿದ್ಧೇಶ್ವರ ಶ್ರೀ

ಪ್ರತಿ ಕೆಲಸ ಕಾರ್ಯ ಸಂಸ್ಕಾರಯುತವಾಗಿರಲಿ

ವಿನಯವಾಣಿ 
ಯಾದಗಿರಿ, ಶಹಾಪುರ: ಬೆಳಗ್ಗೆ ಎದ್ದಾಗಿನಿಂದ ಸಂಜೆ ಮಲಗುವ ತನಕ ಮಾಡುವ ಪ್ರತಿ ಕೆಲಸ ಕಾರ್ಯದಲ್ಲಿ ಸಂಸ್ಕಾರ ಇರಲಿ ಅದು ಮನೆಯಿಂದಲೇ ಶುರುವಾದಾಗ ಮಾತ್ರ ಸಾಧ್ಯ ಎಂದು ಗುಂಬಳಾಪುರ‌ ಮಠದ ಸಿದ್ದೇಶ್ವರ ಶಿವಾಚಾರ್ಯರು ತಿಳಿಸಿದರು.

ತಾಲೂಕಿನ ದೋರನಹಳ್ಳಿ ಪಟ್ಟಣದ ಶ್ರೀ ಶಾಂಭವಿಮಾತಾ ಚಿಕ್ಕಮಠದಲ್ಲಿ ನವರಾತ್ರಿ ಉತ್ಸವದ ಪುರಾಣ ಮಹೋತ್ಸವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

ದಿನೇ ದಿನೇ ಜಗತ್ತು ಸಂಸ್ಕಾರ , ಸಂಸ್ಕೃತಿಯಿಂದ ದೂರ ಉಳಿಯುತ್ತಿದೆ ಅದರಿಂದ ನಮ್ಮ ಮುಂದಿನ ಪೀಳಿಗೆಗೆ ಸಂಸ್ಕಾರ, ಸಂಸ್ಕೃತಿ, ಧರ್ಮ, ಆಚಾರ, ವಿಚಾರ ಉಳಿಯಬೇಕೆಂದರೆ ಅದು ಮನೆಯಿಂದಲೇ ಆರಂಭವಾಗಬೇಕು. ಹೆತ್ತವರು ಮಕ್ಕಳಿಗೆ ಸಂಸ್ಕಾರದ ಪರಿಚಯ ಮಾಡಲಿ ನಂತರ ಗುರುವಿನಿಂದ ಅದು ಮುಂದುವರೆಯಲಿದೆ.

ವಿಭೂತಿ ಭಸ್ಮಕ್ಕಿಂತ ದೊಡ್ಡದಾವುದು ಇಲ್ಲ ಎಂದು ಪಾರ್ವತಿ ದೇವಿ ಪರಮಾತ್ಮನಲ್ಲೆ ಕ್ಷಮೆ ಕೇಳಿದ್ದು ಸಂಸ್ಕಾರದಲ್ಲೆ ಬರುವ ಒಂದು ಅದ್ಭುತ ಪ್ರಸಂಗ. ಸಂಸ್ಕಾರ ಉಳಿಸುವ ಕಾರ್ಯ ಮನೆಯಿಂದಲೇ, ನಿಮ್ಮಿಂದಲೇ, ತಂದೆ ತಾಯಿಯಿಂದಲೇ ಆರಂಭವಾಗಲಿ. ಮಕ್ಕಳಿಗೆ ಸಂಸ್ಕಾರ ಕಲಿಸಿದಾಗ ಮಾತ್ರ ಒಂದು ಉತ್ತಮವಾದ ಜೀವನ, ಸಮಾಜ ಸೃಷ್ಟಿಯಾಗುತ್ತದೆ. ಅದರಿಂದ ಮಕ್ಕಳು ಉತ್ತಮವಾದ ಜೀವನ ಕಟ್ಟಿಕೊಳ್ಳಲಿದ್ದಾರೆ.

ಪುರಾಣ , ಪ್ರವಚನ , ಸತ್ಸಂಗದಲ್ಲಿ ಒಂದಷ್ಟು ಸಮಯ ಕೊಟ್ಟು ಪಾಲ್ಗೊಂಡರೆ ಪುಣ್ಯ, ಮುಕ್ತಿಯ ಪ್ರಾಪ್ತಿಗಳು ದೊರಕುತ್ತವೆ ಎಂದರು.

ಹಿರೇಮಠದ ಅಭಿನವ ಮಹಾಂತ ಶಿವಾಚಾರ್ಯರು ಮಾತನಾಡಿ, ಗ್ರಾಮದ ಸದ್ಭಕ್ತರ ಸಹಕಾರದಿಂದ ಯಶಸ್ವಿ ಧಾರ್ಮಿಕ ಸತ್ಕಾರ್ಯಗಳು ಜರುಗುತ್ತಿವೆ. ಧಾರ್ಮಿಕ ಕಾರ್ಯಗಳು ಮನಸ್ಸಿಗೆ ನೆಮ್ಮದಿ ನೀಡುತ್ತವೆ ಎಂದರು.

ಇದಕ್ಕೂ ಪೂರ್ವದಲ್ಲಿ ಮಾತಾ ವಚನಶ್ರೀ ಅಮ್ಮನವರು ಸವದತ್ತಿ ಶ್ರೀ ರೇಣುಕಾ ಯಲ್ಲಮ್ಮದೇವಿ ಪುರಾಣವನ್ನು ಆರಂಭಿಸಿ ಪ್ರಚುರ ಪಡಿಸಿದರು. ಈ ಸಂದರ್ಭದಲ್ಲಿ ಶ್ರೀಮಠದ ಸದ್ಭಕ್ತರಾದ ವೀರಸಂಗಣ್ಣ ದೇಸಾಯಿ, ಭಗವಂತ್ರಾಯ ಮಲಗೊಂಡ, ಅಬ್ದುಲ್ ಕರಿಂ ಮಠ, ಮಾನಪ್ಪ ಹುಲಸೂರ್, ಸಂಗಣ್ಣ ಕರಿಸಂಗ ಇತರರಿದ್ದರು.