ಆಹಾರ ಮೇಳ : ಮಕ್ಕಳಲ್ಲಿ ವ್ಯವಹಾರಿಕ ಜ್ಞಾನವೃದ್ಧಿಗೆ ಪೂರಕ

“ಆಹಾರ ಮೇಳ” ದಲ್ಲಿ ಮಕ್ಕಳ ಕಲರವ

ಶ್ರೀ ಸಾಯಿ ವಿದ್ಯಾನಿಕೇತನ ಶಾಲೆಯಲ್ಲಿ ಆಹಾರ ಮೇಳ

ವಿನಯವಾಣಿ

ಶಹಾಪುರ: ಮಕ್ಕಳಲ್ಲಿ ವ್ಯಾವಹಾರಿಕ ಜ್ಞಾನ, ಸೃಜನಶೀಲತೆ ಮತ್ತು ಅಡುಗೆ ಕೌಶಲ್ಯದ ಬಗ್ಗೆ ಆಸಕ್ತಿ ಬೆಳೆಸಲು ಶಾಲೆಗಳಲ್ಲಿ ಆಹಾರ ಮೇಳದಂತ ಕಾರ್ಯಕ್ರಮ ಆಯೋಜಿಸುವದು ಅಗತ್ಯವಿದೆ ಎಂದು ಗುರುಕುಲ ಅಕಾಡೆಮಿಯ ಪಿಯು ಕಾಲೇಜು ಪ್ರಾಂಶುಪಾಲರಾದ ಸಾಂಬಶಿವ ಅಭಿಪ್ರಾಯ ವ್ಯಕ್ತಪಡಿಸಿದರು.
ನಗರದ ದಿಗ್ಗಿ ರಸ್ತೆಯಲ್ಲಿರುವ ಸಂಸ್ಕಾರ ಅಕಾಡೆಮಿಯ ಶ್ರೀಸಾಯಿ ವಿದ್ಯಾನಿಕೇತನ ಸಿಬಿಎಸ್ಸಿ ಶಾಲೆಯಲ್ಲಿ ಆಯೋಜಿಸಿದ್ದ ಆಹಾರ ಮೇಳ (ಫುಡ್ ಫೀಸ್ಟ್) ಕಾರ್ಯಕ್ರಮ ಉದ್ಘಾಟಿಸಿ ಅವರು ಮಾತನಾಡಿದರು.

ಇಂತಹ ಮೇಳದಲ್ಲಿ‌ ಮಕ್ಕಳು ಭಾಗವಹಿಸಬೇಕು. ವಿವಿಧ ಬಗೆಯ ಆಹಾರ‌ ಪದಾರ್ಥಗಳನ್ನು ಮಾಡಿಕೊಂಡು ಇಲ್ಲಿ ಸ್ಟಾಲ್ ಹಾಕಿ ಅದನ್ನು ಮಾರಾಟ‌ ಮಾಡುವ ಮೂಲಕ ವ್ಯವಹಾರಿಕ ಜ್ಞಾನದ ಬಗ್ಗೆ ಅವರ ಅರಿವಿಗೆ ಬರಲಿದೆ. ಅವರವರ ಕೌಶಲ್ಯಾಧಾರಿತ ಪದಾರ್ಥ‌ ಅಥವಾ ವಸ್ತುಗಳನ್ನು ತಯಾರಿಸಿ ಆ ಮೂಲಕ ಹೇಗೆ ವ್ಯವಹಾರವನ್ನು ಬೆಳೆಸಬಹುದು ಮತ್ತು ಅದರ ಲಾಭ ನಷ್ಟ‌ದ ಬಗ್ಗೆ ಗ್ರಾಹಕರ ಅಂದರೆ ಜನರ ಅಭಿರುಚಿ‌ ಬಗ್ಗೆ ಕಂಡುಕೊಂಡು ಯಾವ ರೀತಿ ವ್ಯವಹಾರ ನಡೆಸಬಹುದು ಎಂಬ ಸುಲಭ ಜ್ಞಾನ ಅವರಿಗೆ ಅರ್ಥವಾಗಲಿದೆ. ಮುಂದೊಂದು ದಿನ ಇದು ಅವರ ಸ್ವಾವಲಂಬಿ ಬದುಕಿಗೆ ಸಹಕಾರಿಯಾಗಲಿದೆ ಎಂದರು.

ಸಂಸ್ಕಾರ ಅಕಾಡೆಮಿ ಮುಖ್ಯಸ್ಥರಾದ ಡೀನ್ ವಿಜಯಲಕ್ಷ್ಮೀ ಪಾಟೀಲ್ ಮಾತನಾಡಿ, ಆಹಾರ ಮೇಳ ಯಶಸ್ಸಿಗೆ ವಿದ್ಯಾರ್ಥಿಗಳ‌ ಜೊತೆಗೆ ಪಾಲಕರ ಸಹಭಾಗಿತ್ವ ಅಗತ್ಯ. ಮಕ್ಕಳ ವ್ಯವಹಾರಿಕ ಜ್ಞಾನ‌ ಹೇಗಿದೆ ಎಂದು ಪಾಲಕರು ಭಾಗವಹಿಸಿ ಸ್ವತಃ ಅನುಭವಿಸಿದ್ದು ಸಂತಸ ತಂದಿದೆ. ಮಕ್ಕಳು ಉತ್ತಮ ವ್ಯವಹಾರ ನಡೆಸುವ ಮೂಲಕ ಸಂಭ್ರಮಿಸಿದ್ದಾರೆ. ಈ ಕಾರ್ಯಕ್ರಮ ಮಕ್ಕಳಲ್ಲಿ ವ್ಯವಹಾರಿಕ‌ ಜ್ಞಾನದ ಜೊತೆಗೆ ಧೈರ್ಯವು ತುಂಬುತ್ತದೆ ಎಂದರು. ಸಂಸ್ಥೆಯ ಅಧ್ಯಕ್ಷರಾದ ಜಾನಕಿ ಎಸ್.ದರ್ಶನಾಪುರ,
ಶಾಲೆಯ ಪ್ರಾಂಶುಪಾಲೆ ರಶ್ಮಿ‌ ಉಪಸ್ಥಿತರಿದ್ದರು.