ಹರಿಯಾಣ : ಮಹಿಳೆಯೊಬ್ಬರು ಹೆತ್ತ ಮಗಳನ್ನೇ ಮನೆಯಲ್ಲೇ ಹೂತು ಹಾಕಿದ್ದ ಘಟನೆ ಹರಿಯಾಣದ ಫರಿದಾಬಾದ್ನಲ್ಲಿ ನಡೆದಿದೆ.
ಸೌದಿ ಅರೇಬಿಯಾದಲ್ಲಿ ವಾಸಿಸುತ್ತಿದ್ದ ತಂದೆ ತಾಹೀರ್ ದೂರಿನ ಮೇರೆಗೆ ಪೊಲೀಸರು ತನಿಖೆ ನಡೆಸಿದಾಗ ಪ್ರಕರಣ ಬೆಳಕಿಗೆ ಬಂದಿದೆ. 17 ವರ್ಷದ ಪರ್ವೀನಾಳನ್ನು ತಾಯಿ ಅನಿತಾ ಬೇಗಂ ಸಮಾಧಿ ಮಾಡಿದ್ದಳು. ಆದರೆ 10 ತಿಂಗಳ ಬಳಿಕ ಪೊಲೀಸರು ಆಕೆಯನ್ನು ಬಂಧಿಸಿದ್ದಾರೆ. ಅನಿತಾ ಬೇಗಂ ತನ್ನ ಮಗಳನ್ನು ನಾನು ಕೊಂದಿಲ್ಲ, ಆಕೆಯೇ ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ ಅಂತ ಪೊಲೀಸರ ವಿಚಾರಣೆ ವೇಳೆ ಹೇಳಿದ್ದಾಳೆ.
ಸೌದಿ ಅರೇಬಿಯಾದಲ್ಲಿರುವ ತಾಹೀರ್ ತನ್ನ ಪತ್ನಿ ಅನಿತಾ ಸಂಬಂಧದಲ್ಲಿ ಬಿರುಕು ಮೂಡಿತ್ತು. ಅತ್ತ ಮಗಳ ಜೊತೆಗೆ ಅನಿತಾ ವಾಸಿಸುತ್ತಿದ್ದಳು. ಆದರೆ ಬರು ಬರುತ್ತಾ ದೂರದ ಊರಿನಲ್ಲಿದ್ದ ತಂದೆಗೆ ತನ್ನ ಮಗಳ ಪ್ರತಿಕ್ರಿಯೆ ಇಲ್ಲದಿರುವುದು ಅನುಮಾನಕ್ಕೆ ಎಡೆಮಾಡಿಕೊಟ್ಟಿದೆ. ಕೊನೆಗೆ ತಾಹೀರ್ ಈ ಬಗ್ಗೆ ಪೊಲೀಸರಿಗೆ ದೂರು ನೀಡಿದ್ದರು.
ಜೂನ್ 7ರಂದು ಪೊಲೀಸರಿಗೆ ಮೇಲ್ ಮಾಡಿದ್ದರು. ಬಳಿಕ ಪೊಲೀಸರು ಈ ತನಿಖೆ ಕೈಗೆತ್ತಿಕೊಂಡಿದ್ದಾರೆ. ಅನೀತಾ ಬೇಗಂ ತನ್ನ ಮಗಳನ್ನು ಮನೆಯಲ್ಲೇ ಸಮಾಧಿ ಮಾಡಿರುವುದಾಗಿ ಪೊಲೀಸರ ಬಳಿ ಒಪ್ಪಿಕೊಂಡಿದ್ದಾಳೆ. ಕುಟುಂಬಕ್ಕೆ ಕೆಟ್ಟ ಹೆಸರು ಬರುತ್ತದೆ ಅಂತ ಹೆದರಿ ಇಬ್ಬರ ಸಹಾಯದಿಂದ ಸಮಾಧಿ ಮಾಡಿದ್ದಾಗಿ ತಪ್ಪೊಪ್ಪಿಕೊಂಡಿದ್ದಾಳೆ.
ತನಿಖೆ ವೇಳೆ ಅನಿತಾ ಬೇಗಂ, ನಾನು ಆಕೆಯನ್ನು ಕೊಂದಿಲ್ಲ. ಆಕೆ ಬೇರೆಯವರ ಜೊತೆ ಸಂಬಂಧ ಹೊಂದಿದ್ದಳು ಮತ್ತು ಓಡಿ ಹೋಗಲು ಯತ್ನಿಸಿದ್ದಳು. ಅದಕ್ಕೆ ಆಕೆಯನ್ನು ಕೂಡಿ ಹಾಕಿ ಮಲಗಿದೆವು. ಆದರೆ ಅವಳು ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ ಎಂದು ಹೇಳಿದ್ದಾಳೆ.
