ಗಣೇಶನನ್ನು ನೀರಿನಲ್ಲಿ ಏಕೆ ವಿಸರ್ಜಿಸುತ್ತಾರೆ?
ಗಣೇಶ ಚತುರ್ಥಿಯ ಆಚರಣೆಯು ಭಾದ್ರಪದ ಶುಕ್ಲ ಚತುರ್ಥಿಯಂದು ಪ್ರಾರಂಭವಾಗಿ, ಅನಂತ ಚತುರ್ದಶಿಯಂದು ಗಣೇಶ ವಿಸರ್ಜನೆಯ ಮೂಲಕ ಪರಿಪೂರ್ಣಗೊಳ್ಳುತ್ತದೆ. ಈ ಹತ್ತು ದಿನಗಳ ಉತ್ಸವದ ಹಿಂದೆ ಎರಡು ಪವಿತ್ರ ಪೌರಾಣಿಕ ಕಥೆಗಳಿವೆ. ಈ ಕಥೆಗಳು ಕೇವಲ ಸಂಪ್ರದಾಯವಲ್ಲದೇ, ಜೀವನದ ಮಹತ್ತ್ವದ ಸತ್ಯಗಳನ್ನು ಬೋಧಿಸುವ ದಿವ್ಯ ಸಂದೇಶಗಳಾಗಿವೆ.
ಮೊದಲನೇ ಕಥೆ: ಮಹರ್ಷಿ ವೇದವ್ಯಾಸರು ಮಾನವಕುಲಕ್ಕೆ ಜ್ಞಾನದ ಅಮೃತವನ್ನು ಉಣಬಡಿಸುವ ಮಹಾದೃಷ್ಟಿಯಿಂದ ಮಹಾಭಾರತವನ್ನು ರಚಿಸುವ ಸಂಕಲ್ಪ ಮಾಡಿದರು. ಆ ಕಾವ್ಯವನ್ನು ತಡೆರಹಿತವಾಗಿ ಬರೆಯಲು ಸಮರ್ಥ ಲೇಖಕನ ಅಗತ್ಯವಿತ್ತು. ಅವರು ವಿಘ್ನನಿವಾರಕ ಗಣಪತಿಯನ್ನು ಪ್ರಾರ್ಥಿಸಿದರು. ಗಣೇಶನು ಒಂದು ಷರತ್ತಿನೊಂದಿಗೆ ಒಪ್ಪಿಕೊಂಡನು: “ನಾನು ಬರೆಯುವುದನ್ನು ಎಲ್ಲೂ ನಿಲ್ಲಿಸುವುದಿಲ್ಲ. ನೀವು ಸತತವಾಗಿ ಹೇಳುತ್ತಿರಬೇಕು.” ಭಾದ್ರಪದ ಶುಕ್ಲ ಚತುರ್ಥಿಯಂದು ಈ ಮಹಾಕಾರ್ಯಕ್ಕೆ ಚಾಲನೆ ದೊರೆಯಿತು. ಹತ್ತು ದಿನಗಳ ನಿರಂತರ ಶ್ರಮದಿಂದ ಗಣೇಶನ ಶರೀರವು ಬಿಸಿಯಿಂದ ಉರಿಯಿತು. ಅನಂತ ಚತುರ್ದಶಿಯಂದು ಮಹಾಭಾರತ ಮುಕ್ತಾಯಗೊಂಡಿತು. ವ್ಯಾಸರು ಸುಗಂಧಿತ ಜೇಡಿಮಣ್ಣನ್ನು ಗಣೇಶನ ಮೈಗೆ ಲೇಪಿಸಿ, ಸರಸ್ವತಿ ನದಿಯ ಪವಿತ್ರ ನೀರಿನಲ್ಲಿ ಸ್ನಾನ ಮಾಡಿಸಿದರು. ಆ ದಿನದಿಂದ ಗಣೇಶನ ಮೂರ್ತಿಯನ್ನು ನೀರಿನಲ್ಲಿ ವಿಸರ್ಜಿಸುವ ಪದ್ಧತಿ ಪ್ರಾರಂಭವಾಯಿತು.
ಎರಡನೇ ಕಥೆ: ಪಾರ್ವತಿ ದೇವಿಯು ಸ್ನಾನದ ಸಮಯದಲ್ಲಿ ಕಾವಲಿಗಾಗಿ ತನ್ನ ಮೈಯ ಮೃತ್ತಿಕೆಯಿಂದ ಗಣೇಶನನ್ನು ಸೃಷ್ಟಿಸಿದಳು. ಶಿವನು ಒಳಗೆ ಬರುವಾಗ ಗಣೇಶನು ತಡೆದನು. ಕೋಪಗೊಂಡ ಶಿವನು ಗಣೇಶನ ಶಿರವನ್ನು ಛೇದಿಸಿದನು. ಪಾರ್ವತಿಯ ದುಃಖವನ್ನು ಕಂಡು ಶಿವನು ಆನೆಯ ಶಿರವನ್ನು ತಂದು ಜೋಡಿಸಿ ಗಣೇಶನಿಗೆ ಮರುಜೀವ ನೀಡಿದನು. ಈ ಘಟನೆಯು ಗಣೇಶನ ದಿವ್ಯ ಶಕ್ತಿಯು ಜಲತತ್ತ್ವದೊಂದಿಗೆ ನಿಕಟ ಸಂಬಂಧ ಹೊಂದಿದೆ ಎಂದು ತಿಳಿಸುತ್ತದೆ.
ನೀತಿ :– ಮೊದಲನೇ ಕಥೆಯು ಶ್ರಮ, ಸಮರ್ಪಣೆ ಮತ್ತು ವಿಶ್ರಾಂತಿಯ ಸಮತೋಲನವನ್ನು ಬೋಧಿಸುತ್ತದೆ. ಎರಡನೇ ಕಥೆಯು ಜನನ, ಮರಣ ಮತ್ತು ಪುನರ್ಜನ್ಮದ ಚಕ್ರವನ್ನು ತೋರಿಸುತ್ತದೆ.
ಗಣೇಶ ವಿಸರ್ಜನೆಯು ಕೇವಲ ಸಂಪ್ರದಾಯವಲ್ಲ; ಅದು ಕಾಯ-ಮನಸ್ಸಿನ ತಾಪತ್ರಯಗಳನ್ನು ಶಾಂತಗೊಳಿಸುವ ಮತ್ತು ದೈವಿಕ ಶಕ್ತಿಯನ್ನು ಗೌರವದಿಂದ ಕಳುಹಿಸಿಕೊಡುವ ಸಂಕೇತವಾಗಿದೆ.
*ಷ.ಬ್ರ.ಡಾ.ಅಭಿನವ ರಾಮಲಿಂಗ ಶ್ರೀ*
📞 – 9341137882, 9845763534.
