ಅಧಿಕ ಮಾಸದ ವಿಶೇಷತೆ ಐತಿಹ್ಯವೇನು..? ಗೊತ್ತೆ..? ಈ ಮಾಸದಲ್ಲಿ ನೀವು ಮಾಡುವಂತದ್ದೇನು..?

ದಿನಕ್ಕೊಂದು ಕಥೆ

ಅಪಮಾನದಿಂದ ಅಮೃತಪದವಿಗೆ

ಬ್ರಹ್ಮದೇವನು ಸೃಷ್ಟಿಯನ್ನು ಪ್ರಾರಂಭಿಸಿದಾಗ, ಸೂರ್ಯ ಮತ್ತು ಚಂದ್ರರ ಗತಿಯನ್ನು ಆಧರಿಸಿ ವರ್ಷದ ಹನ್ನೆರಡು ತಿಂಗಳುಗಳನ್ನು ರಚಿಸಿದನು. ಪ್ರತಿ ತಿಂಗಳಿಗೂ ಒಬ್ಬೊಬ್ಬ ದೇವತೆಯನ್ನು ಅಧಿಪತಿಯನ್ನಾಗಿ ನೇಮಿಸಲಾಯಿತು. ಸೂರ್ಯನ ಚಲನೆ ಮತ್ತು ಚಾಂದ್ರಮಾನ ಕಾಲಗಣನೆಯ ನಡುವಿನ ವ್ಯತ್ಯಾಸವನ್ನು ಸರಿದೂಗಿಸಲು, ಪ್ರತಿ ಮೂರು ವರ್ಷಗಳಿಗೊಮ್ಮೆ ಒಂದು ಹೆಚ್ಚುವರಿ ತಿಂಗಳು ಉದ್ಭವಿಸುತ್ತಿತ್ತು – ಅದೇ ಅಧಿಕ ಮಾಸ.

ಹನ್ನೆರಡು ತಿಂಗಳುಗಳಿಗೆ ತಮ್ಮ ತಮ್ಮ ಅಧಿದೇವತೆಗಳಿದ್ದರು. ಆಯಾ ತಿಂಗಳುಗಳಲ್ಲಿ ಜನರು ದಾನ, ಧರ್ಮ, ಪೂಜೆಗಳನ್ನು ಮಾಡಿ ದೇವತೆಗಳನ್ನು ಪ್ರಸನ್ನಗೊಳಿಸುತ್ತಿದ್ದರು. ಆದರೆ ಹೆಚ್ಚುವರಿ ತಿಂಗಳಾದ ಅಧಿಕ ಮಾಸಕ್ಕೆ ಯಾವುದೇ ಅಧಿಪತಿ ದೇವತೆ ಇರಲಿಲ್ಲ. ಯಾವ ದೇವತೆಯೂ ಈ ತಿಂಗಳನ್ನು ಅಂಗೀಕರಿಸಲಿಲ್ಲ. ಅದನ್ನು ‘ಮಲಮಾಸ’ (ತ್ಯಾಜ್ಯ ತಿಂಗಳು) ಎಂದು ಕರೆಯಲಾಯಿತು.

ಆ ತಿಂಗಳಲ್ಲಿ ಯಾವುದೇ ಮದುವೆ, ಮುಂಜಿ, ಗೃಹಪ್ರವೇಶದಂತಹ ಶುಭ ಕಾರ್ಯಗಳು ನಡೆಯುತ್ತಿರಲಿಲ್ಲ. ಜನರು ಸತ್ಕರ್ಮಗಳಿಂದ ದೂರ ಉಳಿಯುತ್ತಿದ್ದರು. ನಿರ್ಲಕ್ಷೆ ಮತ್ತು ಅಪಮಾನದಿಂದ ಕೊರಗಿದ ಅಧಿಕ ಮಾಸವು ಒಂದು ಸ್ತ್ರೀರೂಪವನ್ನು ಧರಿಸಿ, ಕಣ್ಣೀರನ್ನು ಸುರಿಸುತ್ತಾ ವೈಕುಂಠಕ್ಕೆ ಧಾವಿಸಿತು.

ಶೇಷಶಯನನಾಗಿದ್ದ ಶ್ರೀಮನ್ನಾರಾಯಣನ ಪಾದಕ್ಕೆ ಬಿದ್ದು ಅಧಿಕ ಮಾಸವು ಅಳಲು ತೋಡಿಕೊಂಡಿತು: “ಪ್ರಭುವೇ, ಸೃಷ್ಟಿಯ ಪ್ರತಿಯೊಂದು ಜೀವಕ್ಕೂ, ಕಾಲದ ಪ್ರತಿಯೊಂದು ಕ್ಷಣಕ್ಕೂ ಗೌರವವಿದೆ. ಆದರೆ ನನ್ನನ್ನು ಎಲ್ಲರೂ ಮಲಮಾಸವೆಂದು ಹೀಯಾಳಿಸುತ್ತಾರೆ. ನನ್ನ ಅವಧಿಯಲ್ಲಿ ಯಾರೂ ಸತ್ಕರ್ಮಗಳನ್ನು ಮಾಡುವುದಿಲ್ಲ. ನನಗೆ ಮುಕ್ತಿ ನೀಡು, ಇಲ್ಲವೇ ಗೌರವ ನೀಡು.” ಅನಾಥರ ರಕ್ಷಕನಾದ ವಿಷ್ಣುವಿಗೆ ಕರುಣೆ ಉಕ್ಕಿಬಂದಿತು. ಅವನು ಅಧಿಕ ಮಾಸವನ್ನು ಕೈಹಿಡಿದೆಬ್ಬಿಸಿ, ತನ್ನೊಂದಿಗೆ ಗೋಲೋಕಕ್ಕೆ ಕರೆದೊಯ್ದನು.

ದೇವತೆಗಳ ಸಮ್ಮುಖದಲ್ಲಿ ಭಗವಂತನು ಮಹತ್ತರವಾದ ಘೋಷಣೆಯನ್ನು ಮಾಡಿದನು: “ಎಲೈ ಅಧಿಕ ಮಾಸವೇ, ಇಂದಿನಿಂದ ನೀನು ಅನಾಥಳಲ್ಲ. ಹನ್ನೆರಡು ತಿಂಗಳುಗಳಿಗೆ ದೇವತೆಗಳು ಅಧಿಪತಿಯಾಗಿರುವಂತೆ, ನಾನೇ ಖುದ್ದಾಗಿ ನಿನಗೆ ಅಧಿಪತಿಯಾಗುತ್ತೇನೆ. ಇಂದಿನಿಂದ ನಿನಗೆ ನನ್ನ ಅತ್ಯುನ್ನತ ನಾಮವಾದ ‘ಪುರುಷೋತ್ತಮ ಮಾಸ’ ಎಂಬ ಹೆಸರನ್ನು ನೀಡುತ್ತೇನೆ. ಜಗತ್ತು ನಿನ್ನನ್ನು ಭಕ್ತಿಯಿಂದ ಪೂಜಿಸಲಿದೆ.”

ಭಗವಂತನು ಈ ತಿಂಗಳಿಗೆ ವಿಶೇಷ ವರಗಳನ್ನು ಅನುಗ್ರಹಿಸಿದನು. *ಅನಂತ ಫಲ* ಉಳಿದ ತಿಂಗಳುಗಳಿಗಿಂತ ಈ ಮಾಸದಲ್ಲಿ ಮಾಡುವ ಜಪ, ತಪ, ದಾನಗಳಿಗೆ ಸಾವಿರ ಪಟ್ಟು ಹೆಚ್ಚು ಪುಣ್ಯ ಲಭಿಸುತ್ತದೆ.

“ದೀಪದಾನ* ಭಗವಂತನ ಮುಂದೆ ಅಖಂಡ ದೀಪವನ್ನು ಹಚ್ಚುವವರ ಜೀವನದ ಅಜ್ಞಾನದ ಕತ್ತಲೆ ದೂರವಾಗುತ್ತದೆ.
*ಮಾಂಗಲ್ಯ ಬಲ* ಮುತ್ತೈದೆಯರು ತಾಮ್ರದ ಪಾತ್ರೆಯಲ್ಲಿ ತಂಬಿಟ್ಟು ಮತ್ತು ಹಣ್ಣುಗಳನ್ನಿಟ್ಟು ‘ಬಾಗಿನ’ ದಾನ ನೀಡುವುದರಿಂದ ಸೌಭಾಗ್ಯ ವೃದ್ಧಿ ಮತ್ತು ಸತ್ಸಂತಾನ ಪ್ರಾಪ್ತಿ ಆಗುತ್ತದೆ.
*ಮಾಲ್ಪುಡ* (ಅನರಸ) ದಾನ ಬ್ರಾಹ್ಮಣರು ಹಾಗೂ ದೀನದಲಿತರಿಗೆ ೩೩ ಅನರಸ ಭಕ್ಷ್ಯಗಳ ದಾನದಿಂದ ಪಿತೃದೋಷ ನಿವಾರಣೆ ಮತ್ತು ಸುಖಸಮೃದ್ಧಿ ಲಭಿಸುತ್ತದೆ.

ನೀತಿ:– ಯಾರನ್ನೂ ಕೀಳಾಗಿ ನೋಡಬಾರದು. ಭಗವಂತನ ಶರಣಾಗತಿಯನ್ನು ಹೊಂದಿದರೆ, ಅತ್ಯಂತ ಅಲಕ್ಷಿತವಾದ ವಸ್ತುವೂ ಸಹ ಪರಮ ಪವಿತ್ರ ಹಾಗೂ ಶ್ರೇಷ್ಠ ಸ್ಥಾನವನ್ನು ಪಡೆಯಬಲ್ಲದು.

ಇದೇ ಪುರುಷೋತ್ತಮ ಮಾಸದ ಮಹಿಮೆ. ಲೌಕಿಕ ಸುಖಗಳಿಗಷ್ಟೇ ಅಲ್ಲದೆ, ಮೋಕ್ಷ ಸಾಧನೆಗೂ ಈ ಮಾಸವು ಭಕ್ತರಿಗೆ ದೈವಿಕ ವರಪ್ರಸಾದವಾಗಿದೆ.

🖊️ಸಂಗ್ರಹ🖋️
*ಷ.ಬ್ರ.ಡಾ.ಅಭಿನವ ರಾಮಲಿಂಗ ಶ್ರೀ*
📞 – 9341137882, 9845763534.